ភាគហ៊ុនរបស់ក្រុមហ៊ុនដឹកជញ្ជូនម្អូប Deliveroo កើនឡើងខ្ពស់បន្ទាប់ពី DoorDash ប្រកាសទិញយក

តម្លៃភាគហ៊ុនក្រុមហ៊ុន Deliveroo បានកើនឡើងដល់ចំណុចខ្ពស់បំផុតមិនធ្លាប់មានក្នុងរយៈពេលជាង 3 ឆ្នាំកាលពីថ្ងៃចន្ទ។ រឿងនេះបានកើតឡើងបន្ទាប់ពីក្រុមហ៊ុននេះបានបញ្ជាក់ថាខ្លួនត្រូវបានផ្តល់ជូន $3.6 ពាន់លានដុល្លារពីក្រុមហ៊ុនដឹកជញ្ជូនអាហាររបស់សហរដ្ឋអាមេរិក DoorDash ។

Deliveroo បាននិយាយកាលពីថ្ងៃសុក្រថាខ្លួនបានទទួលការផ្តល់ជូននេះនៅថ្ងៃទី 5 ខែមេសា។ នៅថ្ងៃច័ន្ទ ក្រុមហ៊ុននេះបានប្រកាសថាខ្លួនកំពុងបញ្ឈប់ផែនការទិញភាគហ៊ុនរបស់ខ្លួនមកវិញ (share buyback) ក្នុងទឹកប្រាក់ 100 លានផោន (ប្រហែល $133.5 លានដុល្លារ) ដើម្បីផ្តោតលើការផ្តល់ជូនមួយនេះ។

ការផ្តល់ជូននេះគឺ 180 ផេន (pence) ក្នុងមួយហ៊ុនដែលធ្វើឱ្យតម្លៃសរុបប្រហែល 3.6 ពាន់លានដុល្លារ។ ក្រុមប្រឹក្សាភិបាលរបស់ Deliveroo បាននិយាយថា ពួកគេទំនងជាទទួលយកការផ្តល់ជូននេះ ប្រសិនបើលក្ខខណ្ឌចុងក្រោយត្រូវបានយល់ព្រម។ ការពិភាក្សាជាមួយ DoorDash នៅតែកំពុងបន្តនៅពេលនេះ។

តម្លៃភាគហ៊ុនរបស់ Deliveroo បានកើនឡើង 17.6% កាលពីថ្ងៃចន្ទ។ ទោះជាយ៉ាងណាក៏ដោយ ភាគហ៊ុនរបស់ក្រុមហ៊ុននៅតែទាបជាងតម្លៃខ្ពស់បំផុតរបស់ពួកគេកាលឆ្នាំ 2021 ។

Deliveroo ដំណើរការនៅក្នុងប្រទេសដូចជា ចក្រភពអង់គ្លេស បារាំង អ៊ីតាលី និងសិង្ហបុរី។ ដៃគូប្រកួតប្រជែងរបស់ខ្លួនរួមមាន Uber Eats និង Just Eat ។ នៅឆ្នាំ 2024 ក្រុមហ៊ុន Deliveroo រកបានប្រាក់ចំណេញប្រចាំឆ្នាំដំបូងរបស់ខ្លួនចំនួន 12.2 លានផោន។

ចំណែក DoorDash វិញ ភាគច្រើនដំណើរការនៅសហរដ្ឋអាមេរិក និងកាណាដា។ ក្រុមហ៊ុននេះក៏បានទិញអាជីវកម្មដឹកជញ្ជូនម្ហូបផ្សេងទៀតដូចជា Wolt ក្នុងឆ្នាំ 2021 ផងដែរ។