កំហុសធំៗ 6 ដែលត្រូវជៀសវាងសម្រាប់អ្នកទើបវិនិយោគ Crypto ដំបូង

មានរឿងជាច្រើនដែលអ្នកវិនិយោគគ្រីបតូថ្មីត្រូវរៀន។ ពិភពគ្រីបតូអាចស្មុគស្មាញបន្តិចសម្រាប់អ្នកវិនិយោគដំបូង ដូច្នេះកំហុសក៏អាចងាយកើតឡើងផងដែរ។ ដំណឹង​ល្អនោះ​គឺ​កំហុសទាំង​នេះគឺ​អាចជៀស​វាង​បាន អត្ថបទនេះនឹងពិភាក្សាពីកំហុសទូទៅដែលអ្នកវិនិយោគបង្កពេលចាប់ផ្តើមជួញដូរ និងវិនិយោគដំបូងលើរូបិយប័ណ្ណគ្រីបតូ។ គោលដៅរបស់ CamAusLife Academy គឺដើម្បីជួយឲ្យអ្នកបង្កើននូវប្រាក់ចំណេញ និងកាត់បន្ថយការប្រឈមមុខនឹងហានិភ័យ។

1. ការជួញដូរដោយផ្អែកលើអារម្មណ៍

វាពិតជាសំខាន់ណាស់ក្នុងការជួញដូរ ឬវិនិយោគដោយមិនផ្អែកលើអារម្មណ៍។ ជាទូទៅ អ្នកវិនិយោគ និងអ្នកជួញដូរគ្រីបតូថ្មីមានផែនការ ឬយុទ្ធសាស្ត្រជួញដូរគ្រីបតូ ហើយធ្វើការសម្រេចចិត្តក្នុងការអនុវត្តផែនការនោះដោយផ្អែកលើតក្ក (ហេតុផល) និងភស្តុតាង មិនមែនតាមអារម្មណ៍ដូចជា ការភ័យខ្លាច ការលោភលន់ ឬភាពមិនច្បាស់លាស់នោះទេ។ វិនិយោគិនគ្រីបតូដែលជោគជ័យភាគច្រើនមានការអត់ធ្មត់ក៏មិនគួរឱ្យជឿ។ ពួកគេធ្វើការវិភាគជាមូលដ្ឋាន និងបច្ចេកទេសយ៉ាងហ្មត់ចត់ fundamental and technical analysis ហើយកំណត់គោលដៅថាតើពេលណាត្រូវទិញ និងពេលណាត្រូវលក់ បន្ទាប់មកពួកគេនៅបន្តភាពអត់ធ្មត់ ហើយអនុវត្តតាមផែនការរបស់ពួកគេ។ ដូចដែល Warren Buffett (កំពូលអ្នកវិនិយោគ) ធ្លាប់បាននិយាយថា “ទីផ្សារភាគហ៊ុនគឺជាឧបករណ៍សម្រាប់ផ្ទេរប្រាក់ពីអ្នកមិនចេះអត់ធ្មត់ទៅកាន់អ្នកចេះអត់ធ្មត់”។ ទីផ្សាររូបិយប័ណ្ណគ្រីបតូក៏មិនខុសគ្នាប៉ុន្មានដែរ។

ប្រសិនបើអ្នកមានផែនការល្អ អ្នកនឹងមិនងាយមានភាពភ័យស្លន់ស្លោក្នុងការទិញ ឬលក់នោះឡើយ នេះជាកំហុសដែលធ្វើឲ្យអ្នកទើបចាប់ផ្តើមដំបូងបាត់បង់ប្រាក់យ៉ាងច្រើន។ ឧទាហរណ៍ គ្រីបតូនៅថ្មីនៅឡើយសម្រាប់ ក ហើយ ក បានទិញ Bitcoin ក្នុងតម្លៃ $50,000 ដុល្លារ។ ទីផ្សារស្រាប់តែចាប់ផ្តើមធ្លាក់ចុះ ហើយគាត់បារម្ភថា Bitcoin នឹងធ្លាក់ចុះមកត្រឹម $10,000 ដុល្លារ ដូច្នេះ ក ភ័យស្លន់ស្លោហើយក៏សម្រេចចិត្តលក់ panic selling កាក់នេះទាំងខាតក្នុងតម្លៃ $40,000 ដុល្លារ។ បន្ទាប់មកទីផ្សារស្ទុះងើបឡើងវិញ ហើយគាត់ភ័យស្លន់ស្លោថាតម្លៃវានឹងឡើងខ្លាំងក៏ទិញ panic buying ត្រឡប់មកវិញក្នុងតម្លៃ $45,000 ដុល្លារទាំងខាតម្តងទៀត។ នេះ​ជា​វិធី​ងាយ​ស្រួល​ក្នុង​ការ​បាត់​លុយ​យ៉ាង​ឆាប់​រហ័ស។ ការមានផែនការវិនិយោគដ៏រឹងមាំអាចជួយអ្នកឲ្យជៀសផុតពីបញ្ហានេះបាន។

2. មិនធ្វើការស្រាវជ្រាវដោយខ្លួនឯងមុនពេលទិញ

បច្ចុប្បន្ន​មាន​រូបិយប័ណ្ណ​ឌីជីថល​ជាង 20,000 ហើយតាមពិតទៅអ្នក​ណាក៏អាច​បង្កើត​រូបិយប័ណ្ណ​គ្រីបតូថ្មីបានដែរ ដូច្នេះវាជាគំនិតល្អក្នុងការធ្វើការស្រាវជ្រាវផ្ទាល់ខ្លួនពីកាក់ណាមួយមុនពេលវិនិយោគប្រាក់ដែលរកបានដោយលំបាករបស់អ្នក។ អ្នក​គួរ​តែ​សួរ​សំណួរ​ដូច​ជា​តើ​អ្នក​អភិវឌ្ឍន៍​សកម្ម​ប៉ុណ្ណា? តើសហគមន៍មានលក្ខណៈដូចម្តេច? អានក្រដាសស whitepaper។ សួរសំណួរនៅលើ Cambodia Australia Life, ក្រុមវិនិយោគលើ Khmermate, Reddit ឬ Twitter។ អានអត្ថបទឲ្យបានច្រើនតាមដែលអ្នកអាចធ្វើបានលើ CamAusLife Academy ។

តើអ្នកដឹងទេ?
គម្រោង​ជាច្រើនបានរៀបរាប់​ពី​ចក្ខុវិស័យ​របស់ពួកគេ​នៅក្នុង​ក្រដាស​ស​ whitepaper របស់​ពួកគេ ហើយ​ប្រើវា​ដើម្បី​ធានា​បាន​ថវិកា​ដើម្បី​អភិវឌ្ឍ​គម្រោងនោះ។ ជាមួយនឹង Bitcoin Satoshi Nakamoto បានសរសេរកូដសម្រាប់បណ្តាញទាំងមូល មុនពេលពួកគេសរសេរក្រដាស​សសម្រាប់ Bitcoin!

សម្រាប់ការវិនិយោគរយៈពេលវែង ត្រូវប្រាកដថាវិនិយោគតែគម្រោងណាដែលមានការដាក់ការប្រើប្រាស់ក្នុងពិភពលោកពិត real-world utility ឬផ្តល់ដំណោះស្រាយលើបញ្ហាជាក់ស្តែងណាមួយ។ មាន​ការ​ឆបោក​ជា​ច្រើន​នៅ​ក្នុង​ទីផ្សារ​រូបិយប័ណ្ណគ្រីបតូ ហើយ​ពួកគេ​ទទួល​បានតែ​​ប្រាក់​ពី​អ្នក​វិនិយោគ​ដែល​មិន​បានសិក្សាស្វែងយល់។ គម្រោងធំខ្លះក៏មានក្រុមដែលគ្មានបទពិសោធន៍ ឬគោលដៅចែកចាយមិនប្រាកដប្រជាដែលអាចជាហានិភ័យក្នុងការវិនិយោគ។

3. វិនិយោគច្រើនជាងអ្វីដែលអ្នកមានលទ្ធភាពក្នុងការខាតបង់

ច្បាប់មាស golden rule មួយជាមួយការវិនិយោគ Crypto គឺវិនិយោគលើអ្វីដែលអ្នកអាចមានលទ្ធភាពក្នុងការបាត់បង់ប៉ុណ្ណោះ (only invest what you can afford to lose)។ នេះមានន័យថា ប្រសិនបើថវិការបស់អ្នកអនុញ្ញាតឲ្យអ្នកវិនិយោគត្រឹមតែ $1,000 ដុល្លារ អ្នកគួរតែវិនិយោគត្រឹមតែ $1,000 ដុល្លារប៉ុណ្ណោះ។ កុំយកប្រាក់កម្ចី ឬខ្ចីប្រាក់ពីគ្រួសារ ឬមិត្តភ័ក្តិដើម្បីវិនិយោគលើសពីសមត្ថភាពរបស់ខ្លួន។ គ្មានការវិនិយោគណាដែលមិនមានហានិភ័យនោះទេ។

4. មិនធ្វើពិពិធកម្មផលប័ត្ររបស់អ្នក

ប្រសិនបើអ្នកទើបតែប្រលូកក្នុងទីផ្សារគ្រីបតូ អ្នកប្រហែលជានឹងទិញ Bitcoin ខ្លះហើយ។ វាជាទ្រព្យសម្បត្តិដ៏ល្អមួយ និងជាចំណុចចាប់ផ្តើមក្នុងការជួញដូរគ្រីបតូសម្រាប់មនុស្សភាគច្រើន ប៉ុន្តែ​មាន​គម្រោង​ល្អៗ​ជាច្រើន​ទៀតដែល​អាច​សក្តិសមទៅនឹង​តម្លៃ ឬ​យុទ្ធសាស្ត្រ​វិនិយោគ​របស់អ្នក។ ការធ្វើពិពិធកម្មផលប័ត្ររបស់អ្នកអាចជាវិធីដ៏ល្អមួយដើម្បីធ្វើឲ្យការវិនិយោគរបស់អ្នកមានស្ថេរភាព។ សាកល្បងវិនិយោគកាក់មួយចំនួនជាជាងកាក់តែមួយ។

ឧទាហរណ៍ ក សម្រេចចិត្តវិនិយោគ $2,000 លើ Bitcoin ក្នុងតម្លៃ $20,000។ បន្ទាប់មក Bitcoin កើនដល់ $25,000 មានន័យថា ក បានចំណេញ $500 ចេញពីការវិនិយោគរបស់គាត់។ ក្នុងអំឡុងពេលនេះ Ethereum បានកើនពី $800 ទៅ $1,400។ ប្រសិនបើ ក បានធ្វើពិពិធកម្មផលប័ត្ររបស់គាត់ ហើយវិនិយោគពាក់កណ្តាលនៃប្រាក់របស់គាត់ទៅក្នុង Ethereum គាត់នឹងរកបាន $750 ដុល្លារពី Ethereum ក៏ដូចជា $250 ពី Bitcoin ដែលប្រាក់ចំណេញសរុបគឺចំនួន $1,000។

រឿងពិតដ៏គួរឲ្យចាប់អារម្មណ៍
ទោះបីជា Bitcoin មានតម្លៃខ្ពស់ជាងគេក្នុងចំណោមរូបិយប័ណ្ណឌីជីថលទាំងអស់។ ជារឿយៗតម្លៃវាមិនឡើងដូចកាក់ដទៃនោះឡើយ ដូចជា Ethereum វាអាចកើនឡើងច្រើនជាងទាក់ទងនឹងតម្លៃគិតជាភាគរយ។ យ៉ាងណាមិញ ជាទូទៅ Bitcoin មិនធ្លាក់ថ្លៃលឿនដូចប្រភេទ altcoins ដែលជាធម្មតា Bitcoin ជាកាក់ល្អមួយក្នុងការរក្សាទុកតម្លៃ។

5. មិនរក្សាសុវត្ថិភាពទ្រព្យសម្បត្តិរបស់អ្នកឲ្យបានត្រឹមត្រូវ

មិនថាតម្លៃផលប័ត្ររបស់អ្នកគឺ $1,000 ឬ $100,000 នោះទេ វាមានសារៈសំខាន់ណាស់ក្នុងការរក្សាសុវត្ថិភាពទ្រព្យសម្បត្តិរបស់អ្នកឲ្យបានត្រឹមត្រូវ។ 

• ព្យាយាមប្រើពាក្យសម្ងាត់ password ដែលស្មុគស្មាញក្នុងការទាយដែលអ្នកមិនប្រើនៅលើគេហទំព័រផ្សេងទៀត។ 
• កុំបង្ហាញសោឯកជន private keys របស់អ្នកទៅកាន់អ្នកដទៃឲ្យសោះ ហើយរក្សាទុកវានៅកន្លែងដែលមានសុវត្ថិភាព។ 
• បើកដំណើរការ Two-Factor Authentication (2FA) ដែលប្រើសារ text message ឬកម្មវិធីភាគីទីបី third-party app ដូចជា Google Authenticator ដើម្បីបង្កើតលេខកូដតែមួយគត់ដែលនឹងត្រូវបានប្រើដើម្បីបញ្ចប់ការចូលប្រើ login របស់អ្នក។ អ្នកគួរប្រើកាបូបផ្នែករឹង hardware wallet ដូចជា Ledger ឬ Trezor សម្រាប់រក្សាទុកគ្រីបតូរបស់អ្នកក្នុងរយៈពេលវែង។

មានចំនួនទឹកប្រាក់ដ៏ច្រើននៅក្នុងទីផ្សារគ្រីបតូ ដែលនេះធ្វើឲ្យអ្នកបោកប្រាស់ និងពួក Hacker មានចំណាប់អារម្មណ៍ខ្លាំង។ ប្រសិនបើអ្នកមិនរក្សាសុវត្ថិភាពទ្រព្យសម្បត្តិរបស់អ្នកឲ្យបានត្រឹមត្រូវនោះទេ អ្នកប្រថុយនឹងការបាត់បង់ជាមិនខាន។

សំខាន់​ក្នុងការចងចាំ
មានប្រយោគមួយដែលប្រើជាទូទៅក្នុងគ្រីបតូ “មិនមែនសោរបស់អ្នក មិនមែនកាក់របស់អ្នក”។ ប្រយោគនេះមានន័យថា បុគ្គលដែលជាម្ចាស់សោឯកជនអាចសម្រេចចិត្តធ្វើអ្វីក៏បាន (កម្មសិទ្ធិពេញលេញ) លើគ្រីបតូរបស់គេ។ ប្រសិនបើអ្នកមិនមែនជាម្ចាស់សោឯកជនទេ អ្នកកំពុងជឿជាក់លើភាគីទីបីជាមួយនឹងគ្រីបតូរបស់អ្នក។ ការរក្សាទ្រព្យសម្បត្តិគ្រីបតូរបស់អ្នកនៅក្នុងកាបូបត្រជាក់មានន័យថាអ្នកជាម្ចាស់សោឯកជនរបស់អ្នក ហើយអ្នកកំពុងរក្សាទុកគ្រីបតូរបស់អ្នកនៅក្នុងកន្លែងដែលមានសុវត្ថិភាពបំផុតជាមួយនឹងស្រទាប់សុវត្ថិភាពបន្ថែមជាច្រើន។ កាបូបផ្នែករឹង ឬកាបូបត្រជាក់ប្រៀបបានដូចជាទូដែកផ្ទាល់ខ្លួនរបស់អ្នក។

6. ការជួញដូរដោយការខ្ចីលុយ – Leverage trading

Leverage trading ឬ margin trading គឺជាយុទ្ធសាស្រ្តជួញដូរគ្រីបតូដែលមានហានិភ័យខ្ពស់ តែរង្វាន់ខ្ពស់ high-risk, high-reward ដែលអនុញ្ញាតឲ្យអ្នកបង្កើនប្រាក់ចំណេញដោយប្រើទ្រព្យសម្បត្តិរបស់អ្នកជាវត្ថុបញ្ចាំដើម្បីខ្ចីប្រាក់មកជួញដូរបានកាន់តែច្រើន។ អ្នកជួញដូរ leverage ដែលមានបទពិសោធន៍អាចរកលុយយ៉ាងច្រើនក្នុងរយៈពេលដ៏ខ្លី ប៉ុន្តែវាពិតជាប្រថុយប្រថានខ្លាំងណាស់សម្រាប់អ្នកជួញដូរដែលទើបតែចាប់ផ្តើម ព្រោះវាក៏អាចធ្វើឲ្យបាត់បង់ប្រាក់យ៉ាងច្រើនក្នុងរយៈពេលដ៏ខ្លីផងដែរ។ ម្តង​ទៀត វា​ជា​ការ​សំខាន់ណាស់​ក្នុង​ការ​​​​​​វិនិយោគលុយរបស់អ្នកលើអ្វីដែលអ្នកអាចមានលទ្ធភាពក្នុងការបាត់បង់ប៉ុណ្ណោះ។

អ្នកគួរជៀសវាង leverage trading រហូតទាល់តែអ្នកមានការយល់ដឹងកាន់តែច្បាស់អំពីការជួញដូរធម្មតា spot trading និងការប្រែប្រួលទីផ្សារ market fluctuations ។ អ្នកជួញដូរជាច្រើនមិនប៉ះពាល់ការជួញដូរ leverage ទាល់តែសោះ ព្រោះតែហានិភ័យវាខ្ពស់ពេក។ យុទ្ធសាស្រ្តជួញដូរដែលមានហានិភ័យខ្ពស់ រង្វាន់ខ្ពស់ផ្សេងទៀត ដូចជា futures និង options ក៏មិនត្រូវបានណែនាំផងដែរនៅពេលអ្នកទើបចាប់ផ្តើមដំបូង។

សង្ខេបឡើងវិញ

ទីផ្សារគ្រីបតូគឺជាកន្លែងថ្មីប្លែក និងគួរឱ្យរំភើប! សព្វថ្ងៃ មានឱកាសជាច្រើនក្នុងការរកប្រាក់ប្រសិនបើអ្នកដឹងថាអ្នកកំពុងធ្វើអ្វី។ ដូចដែលបានរៀបរាប់ខាងលើ អ្នកអាចជៀសផុតពីកំហុសទាំងនេះបាន។ អត្ថបទនេះបានរៀបរាប់អំពីកំហុសទូទៅបំផុតចំនួន 6 ដែលអ្នកជួញដូរថ្មីៗតែងជួប។ ការរៀនដើម្បីជៀសវាងកំហុសទាំងនេះអាចផ្តល់ឲ្យអ្នកនូវឱកាសដ៏ល្អដើម្បីក្លាយជាអ្នកវិនិយោគ ឬអ្នកជួញដូរគ្រីបតូដែលទទួលបានជោគជ័យ។